سوڈانی فوج اور "ریپڈ سپورٹ" فورسز کے درمیان کل ملک کے وسط میں واقع (ریاست الجزیرہ کےدارالحکومت) ود مدنی شہر میں جھڑپیں شروع ہو گئی ہیں۔ جب کہ "ریپڈ سپورٹ" کے ممکنہ حملے کے خطرات کے پیش نظر الرٹ کی صورتحال دیگر پڑوسی ریاستوں تک پھیل گئی ہے، ان میں (ود مدنی کے جنوب میں) سنار کا علاقہ بھی شامل ہے، جس نے ود مدنی کے مشرق میں القضارف ریاست کی طرح کرفیو اور ہنگامی صورتحال کا اعلان کیا ہے۔
ودمدنی میں پھر سے شروع ہونے والی لڑائی کی وجہ سے یہاں کے رہائشیوں میں پریشانی اور نقل مکانی کی لہروں میں اضافہ ہوا ہے۔ جب کہ پرسوں شام امریکی وزارت خارجہ نے اپنے جاری بیان میں "ریپڈ سپورٹ" فورسز کی پیش قدمی کو "انسانی امداد پہنچانے کی کوششوں میں رکاوٹ" شمار کرتے ہوئے مطالبہ کیا کہ وہ الجزیرہ ریاست میں اپنی پیش قدمی کو فوری طور پر روک دے۔
"ریپڈ سپورٹ" نے ود مدنی پر اپنے حملے کے جواز میں کل "X" پلیٹ فارم پر بیان دیتے ہوئے کہا کہ یہ کاروائی "احتیاطی اور اپنے دفاع" میں تھی، جب کہ اس کا یہ بیان آرمی کمانڈر عبدالفتاح البرہان کے اس اعلان کے بعد تھا، جس میں انہوں نے کہا تھا کہ ریاست میں 40,000 افراد ریپڈ سپورٹ فورسز پر حملہ کرنے کے لیے تیار ہیں۔"
اسی ضمن میں، "سوڈانی ڈاکٹرز ایسوسی ایشن" کی ابتدائی کمیٹی نے کہا کہ "ود مدنی میں صحت کی صورتحال تشویشناک ہے اور فارمیسیوں کی بندش کی وجہ سے یہ مزید پیچیدہ ہوتی جا رہی ہے، اور طبی عملے کو شہر میں پناہ لینے والے تقریباً نصف ملین بے گھر لوگوں اور یہاں کے اصل رہائشیوں کو طبی سہولیات اور صحت کی خدمات فراہم کرنے میں انتہائی مشکلات کا سامنا ہے۔"
پیر-05 جمادى الآخر 1445 ہجری، 18 دسمبر 2023، شمارہ نمبر[16456]
