یوکرین کے صدر ولادیمیر زیلنسکی نے نئے سال کے اپنے پیغام میں روسی افواج کو "تباہ" کرنے کا عہد کیا، جنہوں نے تقریباً دو سال قبل ان کے ملک پر حملہ کیا تھا۔
زیلنسکی نے کہا: "آئندہ سال دشمن ہماری ملکی پیداوار سے نقصان اٹھائے گا۔" انہوں نے مزید کہا کہ 2024 میں یوکرین کے پاس اپنے ہتھیاروں میں 10 لاکھ ڈرون شامل ہوں گے، اس کے علاوہ اس کے مغربی شراکت داروں کی طرف سے فراہم کردہ F-16 لڑاکا طیارے بھی ہوں گے۔
ان کے اس ٹیلی ویژن خطاب میں یوکرین کے توپ خانوں اور لڑاکا طیاروں کی تصاویر بھی شامل کی گئی تھیں۔
خیال رہے کہ ان کا نئے سال کا یہ پیغام، ماسکو کی جانب سے یوکرین کے شہروں پر میزائلوں اور ڈرونز کے حملے کے 72 گھنٹے سے بھی کم وقت کے بعد آیا، اور جنگ کے آغاز کے بعد سب سے بڑے اس فضائی حملے میں 39 افراد ہلاک ہوئے ہیں۔
زیلنسکی نے کہا: "ہمارے پائلٹ پہلے ہی F-16 طیاروں کے استعمال میں ماہر ہیں اور ہمیں یقین ہے کہ ہم جلد ہی انہیں اپنی فضاؤں میں دیکھیں گے۔ تب ہمارے دشمن بھی دیکھیں گے کہ ہمارا غصہ کیسا ہے۔"
زیلنسکی نے اپنے مغربی اتحادیوں پر بھی زور دیا کہ وہ اپنی حمایت برقرار رکھیں اور یقین دہانی کی کہ "یوکرینی تمام سازشوں سے زیادہ مضبوط ہیں۔" انہوں نے خبردار کیا کہ "ہمارے ساتھ موجود عالمی یکجہتی کو کم کرنے اور ہمارے اتحادیوں کے اتحاد کو کمزور کرنے کے لیے تمام کوششیں کی جا رہی ہیں۔"
پیر-19 جمادى الآخر 1445ہجری، یکم جنوری 2024، شمارہ نمبر[16470]
