سعودی عرب نے قابض اسرائیلی فورسز کی جانب سے غزہ میں "الاہلی المعمدانی" ہسپتال پر بمباری کے گھناؤنے جرم کی شدید الفاظ میں مذمت کی ہے، جس کی وجہ سے بچوں سمیت سینکڑوں شہری ہلاک اور زخمی ہوگئے ہیں۔
سعودی عرب نے اپنی وزارت خارجہ کے جاری بیان میں تصدیق کی ہے کہ وہ متعدد بین الاقوامی اپیلوں کے باوجود شہریوں کے خلاف جاری مسلسل حملے بند نہ کرنے پر اسرائیلی قبضے کی شدید مذمت کرتے ہوئے اس وحشیانہ حملے کو واضح طور پر مسترد کرتا ہے، جو بین الاقوامی انسانی قانون سمیت تمام بین الاقوامی قوانین اور اصولوں کی کھلی خلاف ورزی شمار ہوتا ہے۔
سعودی وزارت نے زور دیا کہ یہ خطرناک پیش رفت بین الاقوامی برادری سے مطالبہ کرتی ہے کہ جب اسرائیلی مجرمانہ طرز عمل کی بات ہو تو وہ بین الاقوامی انسانی قانون کو لاگو کرنے میں دوہرا معیار اپنانے کو ترک کرے اور اسے چاہیے کہ وہ غیر مسلح شہریوں کو تحفظ فراہم کرنے کے لیے سنجیدہ اور مضبوط موقف اپنائے۔
سعودی عرب نے غزہ میں پھنسے شہریوں کو خوراک اور ادویات پہنچانے کے لیے ممالک اور تنظیموں کی طرف سے دی گئی امدادی اپیلوں کے جواب میں فوری طور پر محفوظ راہداری کھولنے کی ضرورت پر زور دیا اور مطالبہ کیا کہ قابض اسرائیلی فورسز کی جانب سے تمام بین الاقوامی اصولوں اور قوانین کی مسلسل اور بار بار خلاف ورزی کا ذمہ دار ٹھہرایا جائے۔
بدھ-03 ربیع الثاني 1445ہجری، 18 اکتوبر 2023، شمارہ نمبر[16395]
